O Concello de Castroverde homenaxea polo seu centenario ao seu veciño Eduardo González Valiño a través da entrega dunha placa.
Eduardo criouse nunha familia onde foron 7 irmáns pero a día de hoxe só vive el.
Naceu en Penamazada no Concello de Pol e alí estivo vivindo ata que cumpriu os 16 anos. Despois marchou traballar para a Renfe, estivo na estación de Atocha en Madrid. Logo con 22 anos foise para Lalín (Pontevedra) a facer o servizo militar, aí foi onde verdadeiramente aprendeu a ler e a escribir. Cando rematou o servizo militar foise para Meira a traballar en Correos, máis adiante decidiu montar coa súa muller o seu propio negocio de roupa no Cádavo (Baleira). Anos máis tarde, aló polo 1955 emigrou a Venezuela, alí traballou nun teleférico, montou unha fábrica de espuma para mobles e colchóns con 120 traballadores, para máis tarde acabar dedicándose alí á construción.
En 1994 decidiu volver a España, xa que era onde tiña toda a súa familia, e aquí en Castroverde é onde decide construir a súa casa concretamente na Travesía de Vilabade, onde se dedica aínda a día de hoxe ás labores do campo (acaba de facer fai poucos días a sembra de patacas para o autoconsumo). Actualmente vive coa súa muller, que nos próximos meses tamén cumprirá o centenario. Tivo 2 fillos, aínda que a día de hoxe só vive unha delas.
Moitos parabéns para o noso veciño Eduardo🥳🥳🎉🎉
